މަޢުރޫފީ އުނގެނުމުގެ ނަޒަރިއްޔާ

މަޢުރޫފީ ވިސްނުމުގެ ނަޒަރިއްޔާގައި އުނގެނުން މާނަކުރާގޮތުގައި އުނގެނޭ ފަރާތަށް މާޙައުލުން ލިބިދޭ މަޢުލޫމާތެއް ދަސްވެ ދެނެގަތުމުގައި ޙަރަކާތްތެރި ރޯލެއް އަދާކުރެއެވެ. މި ނަޒަރިއްޔާގައި އަލިއަޅުވާލާނީ އިންސާނާގެ ސިކުނޑިއަށް އަންނަ ބަދަލުތަކުގެ ސަބަބުން ސުލޫކަށް އަންނަ ބަދަލުތަކުގެ މައްޗަށެވެ. މިގޮތުން، އުނގެނުން ބިނާވަނީ ކުރިން އެނގިފައިވާ އެއްޗެއްގެ މައްޗަށް އަލަށް ދެނެގަނެވޭ އެއްޗެއް ގުޅުވާލެވިގެންނެވެ. މި ގުޅުވާލެވޭ ގުޅުވާލުން އޭނާގެ ވިސްނުމަށާއި ސުލޫކަށް ވެސް ބަދަލުތައް ގެނެއެވެ. މި ނަޒަރިއްޔާގައި ހާއްސަކޮށް ފާހަގަކުރާ ގޮތުގައި އުނގެނުން މާނަކުރެވެނީ މާޙައުލުން މަޢުލޫމާތު ގެންގޮސް ސިކުޑީގައި ޖަމާކުރުމަށެވެ. މި ނަޒަރިއްޔާގެ މައިގަނޑު މޮޑެލަކީ އިންފޮމޭޝަން ޕްރޮސެސިންގ ތިއަރީ (އައި ޕީ ޓީ) ނުވަތަ އިންފޮމޭޝަން ޕްރޮސެސިންގ މޮޑެލް (އައި ޕީ އެމް) އެވެ.

މަޢުލޫމާތު ސިކުނޑީގައި ރައްކާކުރެވޭ ގޮތް އަޅާ ކިޔެނީ ކޮމްޕިޔުޓަރ ގައި މަޢުލޫމާތު ރައްކާކޮށް ބޭނުންކުރެވޭ ގޮތާއި ކައިރި ގޮތެއްގެ ގޮތުގައެވެ. މި ވިސްނުމުގައި މާޙައުލުން މަޢުލޫމާތު ވަންނަ ތިން ޖާގައެއް (މެމޮރީ) އިންފޮމޭޝަން ޕްރޮސެސިންގ މޮޑެލްގައި ސިފަކުރެވިފައި ވެއެވެ. އެއީ،
މަޢުލޫމާތު އަލަށް ރަޖިސްޓްރީކުރެވޭ ތަނާއި (ސެންސަރީ ރެޖިސްޓަރ) އާއި މަޢުލޫމާތު ބޭނުންކުރެވޭ ތަނާއި (ވަރކިންގ މެމޮރީ) އަދި މަޢުލޫމާތު ދިގު މުއްދަތަށް ރައްކާކުރެވޭ ތަން (ލޯންގޓަރމް މެމޮރީ) އެވެ. މި މޮޑެލްގައި ހާމަކުރާ ގޮތުގައި އެއް ޖާގައިން އަނެއް ޖާގައަށް މަޢުލޫމާތު ބަދަލުކުރެވެނީ ވަކި ޚާއްޞަގޮތްތަކެއް މެދުވެރިވެގެން ނެވެ. މިގޮތުން، އަންނަނިވި ގޮތްތައް ފާހަގަކުރެވެއެވެ.

>   ސަމާލުކަން ދީގެން (އެޓެންޝަން)

>   އަމިއްލަ ވިސްނުމުން އެނގިފައިވާކަމަކާއި ގުޅުވައިގެން (ޕާރސެޕްޝަން)

>   ކިޔައި ތަކުރާރުކޮށް މުރާޖަޢާކޮށްގެން (ރިހާސަލް)

>   ތަފާތު ނަންނަން ދީގެން ކަންކަމާއި ގުޅުވައިގެން (އެންކޯޑިން)

>   ހަނދާނަށް ގެނެސްގެން (ރިޓީރީވަލް)

މަޢުރޫފީ އުނގެނުމުގެ ނަޒަރިއްޔާގެ ޕްރިންސިޕްލްތައް:

1-    އުނގެނުން މާނަހުރި އެއްޗަކަށްވާނީ ކުރިން އެނގިފައިވާ އެއްޗަކާއި އަލަށް އެނގޭ އެއްޗެހި ގުޅުވާލުމުންނެވެ.

2-    ފައިދާހުރި އުނގަންނައިދިނުމަކަށްވާނީ ދަރިވަރުންގެ ސިކުނޑީގެ ތަފާތު މަސައްކަތްތަކަށް ރިޢާޔަތްކޮށް ކިޔައިދެވިގެންނެވެ.

3-    ކިޔަވައިދޭއިރު ވަރކިންގ މެމޮރީއަށް މަޢުލޫމާތު ހަޖަމުވާ މިންވަރަށް ރިޢާޔަތްކޮށްގެން ކިޔަވައިދިނުން.

4-    އުގެނުމަކީ ޙަރަކާތްތެރި ވަކިކަމަކަށް އަމާޒުކޮށްގެން ކުރެވޭ ކަމަކަށް ހެދުން.

އިންފޮމޭޝަން ޕްރޮސެސިންގ މޮޑެލްގެ އެހީތެރިކަމާއެކު ކުލާސްރޫމުގެ ކިޔަވައިދިނުން ރަނގަޅު ކުރެވިދާނެ ތަފާތުގޮތްތައް:

>   ކިޔަވައިދޭއިރު އަބަދުވެސް ދަރިވަރުންގެ ސަމާލުކަން ހޯދާ، ސަމާލުކަން ދެމެހެއްޓުން

>   ކިޔަވައިދޭއިރު ދަރިވަރުންނަށް ކުރިން އެނގިފައިވާ މަޢުލޫމާތާއި ފަހުން އެނގޭ މަޢުލޫމާތު ގުޅުވާލުން.

>   ކިޔަވައިދޭއިރު ދަރިވަރުން އުގެނެމުން ދާއެއްޗެއް ދޭހަކުރުމަށް ފުރުޞަތުދިނުން.

>   މަޢުލޫމާތުތައް ފަރިތަކޮށް ތާޒާކުރުމަށް ފުރުޞަތު ފަހިކޮށްދިނުން.

>   މުހިއްމު ނުކުތާތައް ފާހަގަކޮށްދެމުން ކިޔަވައިދިނުން.

>   މަޢުލޫމާތު ފޯރުކޮށްދޭއިރު ރޭވިގެން ތަރުތީބުން ގެންދެވޭ ބައިތަކެއްގެ ގޮތުގައި މަސްހުނިނުކޮށް ކިޔަވައިދިނުން.

>   ކިޔަވައިދޭއިރު ދަރިވަރުންނަށް ދޭހަވާ މިންވަރު ހުށަހަޅަން ފުރުޞަތު ދިނުން.