ސޯޝަލް ކޮގްނިޓިވް ލަރނިންގ ތިއަރީ

ސޯޝަލް ކޮގްނިޓިވް ލަރނިންގ ތިއަރީ އުފެދިފައިވަނީ ނަފްސާނީ ޢިލްމުވެރިއެއްކަމަށްވާ އަލްބަޓް ބަންދޫރާގެ ވިސްނުމުގެ މައްޗަށެވެ. އުނގެނުމަކީ މާހައުލުން ގެންދެވޭ މަޢުލޫމާތު ބަދަލުކޮށް ސިކުނޑީގައި އެކަމާ ގުޅޭގޮތުން އުފައްދާ އަސަރަކުން ސުލޫކު ވަކިގޮތަކަށް ބަދަލުވުން ކަމުގައި އަލްބަޓް ބަންދޫރާ (1986) ހާމަކުރައްވައެވެ. މިތިއަރީގައި ބަންދޫރާ ފާހަގަކުރާ މައިގަޑު ކޮންސެޕްޓަކީ ''ރެސިޕްރޯކަލް ރިލޭޝަންޝިޕް'' ނުވަތަ ''ގުޅިލާމެހިފައިވާ ގުޅުން'' މިއެވެ.  މި ކޮންސެޕްޓް  ބަންދޫރާ ތަފްޞީލް ކުރަމުން ފާހަގަކުރާ ގޮތުގައި މިގުޅުމުގައި މައިގަނޑު ތިންބައެއް ހިމެނެއެވެ. އެ ބައިތަކަކީ

ކަމެއް ނުވަތަ ސުލޫކު (ބިހޭވިއަރ)، މާހައުލު،  އަދި މީހާގެ ވިސްނުމެވެ. މިއިން ކޮންމެ ބައެއް އެއްކަމެއް އަނެއްކަމަކަށް އަސަރުކުރުވައެވެ.

މޮޑެލިން (ނަމޫނާ ބެލުން):

އެއީ ކޮންމެވެސް އެހެންމީހެއް ނުވަތަ ކަމެއް، ކަމެއްގެ ނަމޫނާއަކަށް ބެލުމެވެ. މިގޮތުން، މި މޮޑެލްގައި ކުދިން ވަށައިގެންއުޅޭ އެކިމީހުން ކުރާ ކަންތައް ބަލާ ކޮޕީކޮށްގެން އެކަން އެގޮތަށް މޮޑެލްކުރަން މަސައްކަތް ކުރެއެވެ. ނުވަތަ އެކުދިން އެކަން ފެނުނުގޮތަށް ނަކަލު ކުރެއެވެ.  މިގޮތުން، ތިރީގައި އެވާ ތާވަލުގައި އެވަނީ ބަންދޫރާ ފާހަގަކުރާ މޮޑެލިންގެ ވައްތަރުތަކެވެ.

މިސާލު	ދޭހަ	ވައްތަރު
ކުލާހެއްގައި ޤައުމީދިދަ ކުރަހާގޮތް ކިޔާދިނުމުން އެގޮތް  އެއްވެސް ބަދަލެއް ނުގެނެސް ކޮޕީކުރުން.	ފެންނަކަމެއް އެއްވެސް ބަދަލެއް ނުގެނެސް ނަކަލުކުރުން.	ޑައިރެކްޓްކޮށް މޮޑެލްކުރުން.
ފީފާ ވޯލްޑްކަޕް އޮތްއިރު، މަޝްހޫރު ކުޅުންތެރިން ބޯ ހަދާގޮތަށް ހަދާ އެގޮތަށް ބޯ އޮމާންކުރުން.	ފޮތްތަކުންނާއި ވާހަކައިން އަދި ޓީވީން އެނޫންވެސް ކޮންމެވެސް ވަސީލަތެއް މެދުވެރިކޮށް ތަފާތު ޝަޚްޞިއްޔާތުތަކުން ފެންނަ ކަންކަން ނަކަލު ކުރުން.	ސިމްބޮލިކްކޮށް މޮޑެލްކުރުން.
ގެއެއް ކުރަހާނެގޮތް މީހަކު ކިޔާދިނުމުން ގެކުރަހާ އިރު، އަމިއްލަގޮތެއް ހިމަނާލައިގެން ގެ ކުރެހުން.	މީހެއްގެ ފަރާތުން ނުވަތަ އެހެންވެސް ގޮތަކުން ފެނުނު ކަމެއް ބަދަލަކާއެކު، ނަކަލުކުރުން. ނުވަތަ އެހެންގޮތަކަށް ބަދަލުކޮށް ގެން އެކަންކުރުން.	ސިންތަސައިޒްކޮށް މޮޑެލްކުރުން.

       ބަންދޫރާ ފާހަގަކުރާ ގޮތުގައި ކުދިން ހަމައެކަނި ބަލައިގެން ދަސްކުރަނީކީ ނޫނެވެ. އެކަމެއް ކޮށްފިނަމަ ވާނެގޮތްވެސް އެނގެއެވެ. ހަޤީޤަތުގައި ބަލައިގެން އުގެނުން މިއީ ވަރަށް ބޮޑު އަހަމިއްޔަތުކަމެއް ދޭންޖެހޭ އުނގެނުމުގެ ވައްތަރެކެވެ. ބަލައިގެން އުނގެނުމަށް ފުރުޞަތު ދިނުމަށްޓަކައި ކިޔަވައިދިނުމުގައި ބޭނުންކުރުމަށްޓަކައި އަންނަނިވި ކަންތައްތަކަށް ވިސްނުން މުހިއްމެވެ.

E     ސަމާލުކަން (އެޓެންޝަން)

E     ދެކެފައިވާކަމެއް ހަނދާނަށް ގެނައުން(ރިޓެންޝަން)

E     ބެލުމަށްފަހު އަމިއްލައަށް ކުރުމުގެ ޤާބިލުކަން (ޕްރޮޑަކްޝަން)

E     ކަމެއް ކުރުން (ޕާރފޯމަންސް) މީގައި ޝައުޤުވެރިކަން ވަރަށް ބޮޑު ދައުރެއް އަދާކުރެއެވެ.

އެހެންމީހުންގެ ފުށުން އުނގެނުން (ވިކޭރިއަސް ލަރނިންގ)

     މިއީ އެހެންމީހުންގެ ތަޖުރިބާ އިން ދަސްކުރުން ނުވަތަ އުނގެނުމެވެ. ޢާއްމުކޮށް މިގޮތަށް އުނގެނެވެނީ އެހެންމީހުންނަށް ދިމާވާ ކަންކަމުގެ ނަތީޖާއަށް ބަލައިގެން އޭނާގެ ސުލޫކު ވަކިގޮތަކަށް ބަދަލު ކުރުމުންނެވެ. މިގޮތުން، ވިކޭރިއަސްކޮށް އުނގެނޭ އިރު ބައެއް ފަހަރު ވަކިކަހަލަ ކަމަކުން ދުރުވާ ފަދަ ކަމެއް ދިމާވުމުން ކިޔަނީ ވިކޭރިއަސްކޮށް ޕަނިޝްވުމެވެ. އަދި ވަކިކަމެއް ކުރާހިތްކުރުވުން ނުވަތަ ކުރުން އިތުރުވާ ގޮތްވާނަމަ ކިޔަނީ ވިކޭރިއަސްކޮށް ރިއިންފޯސްވުމެވެ.

އަމިއްލައަށް ކަންކަން ބެލެހެއްޓުން (ސެލްފް ރެގިއުލޭޝަން)

       ބަންދޫރާ ފާހަގަކުރާގޮތުގައި މާހައުލުން ބަލައިގެން އުނގެނުނަސް އަދި މޮޑެލިން މެދުވެރިކޮށް އުނގެނުނަސް ނުވަތަ ވިކޭރިއަސްކޮށް އުނގެނުނަސް މިއިން ކޮންމެ ބާވަތެއްގައި ވެސް ސެލްފް ރެގިއުލޭޝަން ވަރަށް ބޮޑު ދައުރެއް އަދާ ކުރެއެވެ. ސެލްފު ރެގިއުލޭޝަން އަކީ ޙާޞިލުކުރަން ބޭނުންވާ ގޯލާ ހަމައަށް ދިއުމަށްޓަކައި ވިސްނުމާއި ސުލޫކު އަދި އިހުސާސްތައް ވަކިގޮތަކަށް ކޮންޓްރޯލް ކުރުމެވެ. ސެލްފުރެގިއުލޭޓެޑް ލަރނާއިން (ސެލްފްރެގިއުލޭޝަން އުނގެނުމެއް ލިބިފައިވާ) ކުދިންގެ ކިބައިގައި ވަރަށް މުހިއްމު ދެބައެއް ހިމެނެއެވެ. އެއީ އުނގެނުމުގެ ތަފާތު ހުނަރުތަކާއި އަމިއްލަ ނަފުސު ކޮންޓްރޯލް ކުރުމުގެ ފުރިހަމަ ޤާބިލުކަން، މި ދެ ކަމުގެ ސަބަބުން ބޭނުންވާ ގޯލު ޙާޞިލުކުރުމަށް ފަސޭހަވެގެން ދެއެވެ. މީގެ މާނައަކީ އެކުދިންގެ ކިބައިގައި ކިޔެވުމުގެ ހުނަރާއި އުނގެނުމުގެ ޢަޒުމު ލިބިގެންވާ ވާހަކަ އެވެ.

ކިޔަވައިދިނުމުގައި ސެލްފް ރެގިއުލޭޝަން ބޭނުންކުރާނެ ގޮތް

E   ކިޔަވައިދޭ ބައިތަކާއި އެކު އެބައިތައް ދަސްކުރާނެ ގޮތާއި ފަރިތަކުރާނެ ތަފާތު ގޮތްތައް ބުނެދެމުން ދިއުން.

E   މުދައްރިސުގެ ކިބައިން ސެލްފު ރެގިއުލޭޝަންގެ މިސާލާއި ނަމޫނާ ދެއްކުން.

E   ގިނަ ވައްތަރު ވައްތަރުގެ ކިޔަވާ ގޮތްތައް ކިޔައިދިނުން.

E   ވަކި ކަހަލަ ގޮތެއް ކިޔެވުމަށް ބޭނުންކުރާނީ ކޮންވާވަތެއްގެ މަޢުލޫމާތަކާ އެކުކަން ބުނެދިނުން.

E   އަލަށް ދަރިވަރުން މިކަމަށް ހާނުވަން ފަށާއިރު އެސައިންމަންޓްގެ ސިފައިގައި މަސައްކަތްތައް ދިނުން.

E   ފުރަތަމަ ދުވަސްކޮޅު ކުރެވޭ ކަންކަން އަމިއްލައަށް ވަޒަންކުރަން ހިތްވަރުދީ ހެދުން.

E   ގުރޫޕުގައި މަސައްކަތް ކުރުމުގައި އަބަދުވެސް އެހީތެރިވެދިނުން.